ಅಗಸ್ತ್ಯಮುನಿಗಳಿಗೆ ದಕ್ಷಿಣಭಾರತದ ಇತಿಹಾಸದಲ್ಲಿ ವಿಶೇಷ ಸ್ಥಾನವಿದೆ.ಇತಿಹಾಸ-ಪುರಾಣಗಳಲ್ಲಿ ಅವರ ದಕ್ಷಿಣಭಾರತಪಯಣದ ಬಗ್ಗೆ ವಿವರವಿದೆ.ಅವರ ಆದೇಶದ ಮೇರೆಗೆ ವಿಂಧ್ಯಪರ್ವತವು ಎತ್ತರ ಬೆಳೆಯುವುದನ್ನು ನಿಲ್ಲಿಸಿ, ಹಿಮಾಲಯಪರ್ವತದ ಭವ್ಯತ್ವಕ್ಕೆ ಎಸಗಿದ್ದ ಸವಾಲು ದಮನವಾಯಿತು. ಇತರ ಕಥನಗಳ ಅನುಸಾರ, ಇವರು ಕಾವೇರಿ ನದಿಯ ಉದ್ಗಮಕರ್ತೃಗಳೂ ಹೌದು.ಗಣೇಶನು ಕಾಗೆಯರೂಪದಲ್ಲಿ ಅವರ ಕಮಂಡಲುವನ್ನು ಉರುಳಿಸಿದ . ಅಲ್ಲಿಂದ ತೊಟ್ಟಿಕ್ಕಿದ ನೀರು ಕಾವೇರಿ ನದಿಯಾಯಿತು .ಇತರ ಸ್ರೋತಗಳು ಮುನಿಗಳ ಪತ್ನಿ ಲೋಪಮುದ್ರೆಯನ್ನು ಕಾವೇರಿಯೆಂದು ಚಿತ್ರಿಸುತ್ತವೆ.ತೋಳ್ಕಪ್ಪಿಯಂ ಎಂಬ ಪ್ರಪ್ರಥಮ ತಮಿಳ್ ಗ್ರಂಥವು ಅಗಸ್ತ್ಯಮುನಿಗಳ ರಚನೆಯೆಂದು ತಿಳಿಯುತ್ತದೆ . ಇದರಲ್ಲಿ ತಮಿಳ್ ವ್ಯಾಕರಣದ ವ್ಯಾಖ್ಯಾನವಿದ್ದು, ೨ನೆಯ ಪೂರ್ವ ಸಾಮಾನ್ಯ ಯುಗದಲ್ಲಿ ರಚಿಸಲ್ಪಟ್ಟಿದೆ . ತೋಳ್ಕಪ್ಪಿಯಂ ಗ್ರಂಥವು ಸ್ವತಃ ಅಗತ್ತಿಯಂ ಎಂಬ ಪುಸ್ತಕದ ಉಲ್ಲೇಖ ಮಾಡಿದೆ , ಆದರೆ ಆ ಪುಸ್ತಕವು ಕಳೆದು ಹೋಗಿದೆ. ಮೂಲ- ಅಗಸ್ತ್ಯ ಇನ್ ತಮಿಳ್ ಲ್ಯಾಂಡ್ -ಶಿವರಾಜ ಪಿಳ್ಳೈ

ಪರಶುರಾಮರ ತಂದೆ ಕ್ಷತ್ರಿಯನಿಂದ ಕೊಲ್ಲಲ್ಪಟ್ಟರು . ಕೋಪದಲ್ಲಿ ಪರಶುರಾಮ ಎಲ್ಲಾ ಕ್ಷತ್ರಿಯರನ್ನೂ ಕೊಲ್ಲುವ ಶಪಥ ಮಾಡಿದ. ಅವನು ೨೧ ಬಾರಿ ವಿನಾಶಕ ದಂಡಯಾತ್ರೆಯನ್ನು ಕೈಗೊಂಡು ಎಲ್ಲಾ ಕ್ಷತ್ರಿಯರನ್ನು ಕೊಂದನು. ಎಲ್ಲಾ ಭೂಮಿಯನ್ನೂ ಬ್ರಾಹ್ಮಣರಿಗೆ ದಾನಮಾಡಿ, ತನಗೇ ಭೂಮಿಯಿಲ್ಲದಾದಾಗ ಸುಬ್ರಹ್ಮಣ್ಯನು ವರುಣದೇವರಿಂದ ಭೂಮಿ ಕೇಳಲು ಉಪದೇಶಿಸಿದನು. ಎಲ್ಲಿಯವರೆಗೂ ಅವನ ಕೊಡಲಿಯ ಒಂದು ಎಸೆತ ಭೂಮಿಯನ್ನು ಆವರಿಸುತ್ತಿತ್ತೋ, ಅಲ್ಲಿಯವರೆಗೂ ಪರಶುರಾಮನು ಸಮುದ್ರದಿಂದ ಆ ಭೂಮಿಯ ಹಕ್ಕನ್ನು ಪಡೆಯಬಹುದಾಗಿತ್ತು.ಪರಶುವಿನ ಎಸೆತದಿಂದ ಕನ್ಯಾಕುಮಾರಿಯಿಂದ ಗೋಕರ್ಣದವರೆಗಿನ ಇಡೀ ಕರಾವಳಿಯ ಭೂಭಾಗವು ಸಮುದ್ರದಿಂದ ಕೊರೆಯಲ್ಪಟ್ಟಿತು.೧೨ನೇ ಸಾಮಾನ್ಯಯುಗದ ಕನ್ನಡ ಶಾಸನಗಳು ಇದನ್ನು ಉಲ್ಲೇಖಿಸಿವೆ. ಆದರೆ ಪೂರ್ವ ಪುರಾಣಗಳಲ್ಲಿ ಇದರ ಮಾಹಿತಿಯಿಲ್ಲ. ಆಕರ- ಎ ಹಿಸ್ಟರಿ ಆಫ್ ಸೌತ್ ಇಂಡಿಯಾ – ನೀಲಕಂಠ ಶಾಸ್ತ್ರಿ

ಯಾದ್ಗೀರ್ ಜಿಲ್ಲೆಯ ಇಸಾಂಪುರ ಬಹುಪುರಾತನ ಸ್ಥಳ . ಇಲ್ಲಿ ಸುಣ್ಣದಕಲ್ಲಿನ ನಿಕ್ಷೇಪಗಳು ಇವೆ. ೧೯೮೩ರಲ್ಲಿ ನೀರಾವರಿಯೋಜನೆಯು ನಡೆಯುತ್ತಿದ್ದಾಗ ಆಕಸ್ಮಿಕವಾಗಿ ಬೆಳಕಿಗೆ ಬಂದ ಸ್ಥಳವಿದು. ಈ ಸ್ಥಳವು ೫೦೦,೦೦೦-೬೦೦,೦೦೦ ವರ್ಷಗಳ ಪುರಾತನಸ್ಥಳವೆಂದೂ ಹಾಗೂ ೧.೨೭ ಮಿಲಿಯನ್ ವರ್ಷ ಪುರಾತನವಿರಬಹುದು ಎಂದು ಹೇಳಲಾಗಿದೆ . .ಈ ಸ್ಥಳವು ಸುಣ್ಣದ ಕಲ್ಲಿನ ಗಣಿಯಾಗಿದ್ದು, ಇಲ್ಲಿ ಕಲ್ಲು ಉಪಕರಣಗಳನ್ನು ನಿರ್ಮಿಸಲಾಗುತ್ತಿತ್ತು. ಮುಖ್ಯ ಉಪಕರಣಗಳು ಇವು- ಕೊಚ್ಚುವ ಉಪಕರಣಗಳು , ಕತ್ತಿಗಳು , ಕೊಡಲಿಗಳು, ಛೇದಕಗಳು ಮತ್ತು ಹೆರೆಪಟ್ಟಿಗಳು. ಅಲ್ಲಿ ಕೆಲ ಪೂರ್ಣ ತಯಾರಾದ ಉಪಕರಣಗಳು ಹಾಗೂ ದೊಡ್ಡ ಅರೆ ತಯಾರಾದ ಉಪಕರಣಗಳೂ ಇದ್ದವು. ಇಲ್ಲಿ ಗಣಿಗಾರಿಕೆಯ ಪುರಾವೆಗಳು ಉಪಕರಣತಯಾರಿಕೆಯ ಪ್ರತಿ ಹಂತದಲ್ಲೂಕಂಡುಬರುತ್ತವೆ.ಇಲ್ಲಿ ವಸತಿಯ ಚಿಹ್ನೆಗಳೂ ಕಾಣುತ್ತವೆ . ಸ್ರೋತ- ಎ ಹಿಸ್ಟರಿ ಆಫ್ ಏನ್ಶಿಯೆಂಟ್ ಅಂಡ್ ಅರ್ಲಿ ಮೆಡೀವಲ್ ಇಂಡಿಯಾ ,ಉಪಿಂದರ್ ಸಿಂಘ್

ಅಶೋಕನ ಶಿಲಾಶಾಸನಗಳು ಅವನ ಸಾಮ್ರಾಜ್ಯದ ವ್ಯಾಪ್ತಿಯನ್ನು ತಿಳಿಸುತ್ತವೆ. ಕರ್ನಾಟಕದ ರಾಯಚೂರು, ಬಳ್ಳಾರಿ, ಗುಲ್ಬರ್ಗಾ ಮತ್ತು ಚಿತ್ರದುರ್ಗ ಜಿಲ್ಲೆಗಳಲ್ಲಿ ಇವು ಕಂಡುಬಂದಿವೆ.
.ಸಂಶೋಧಕರು ಶಿಲಾಶಾಸನಗಳಲ್ಲಿ ‘ ದೇವನಾoಪಿಯ ‘ ಹೆಸರನ್ನು ಮತ್ತೆ ಮತ್ತೆ ಕಂಡರು . ಅವರ ಪ್ರಕಾರ ಇದು ಅಶೋಕನನ್ನೇ ಸೂಚಿಸುತ್ತದೆ.ಆದರೆ ಶ್ರೀಲಂಕಾ ಸ್ರೋತವು ಮಾತ್ರವೇ ಈ ಸಂಬಂಧಕ್ಕೆ ಪುರಾವೆಯಾಗಿದೆ.
1915ರಲ್ಲಿ ರಾಯಚೂರು ಜಿಲ್ಲೆಯ ಮಾಸ್ಕಿಯಲ್ಲಿ ದೊರೆತ ಶಿಲಾಶಾಸನದಲ್ಲಿ “ದೇವಾನಂಪಿಯಸ ಅಸೋಕಸ” ಎಂಬ ಉಲ್ಲೇಖವಿದೆ. ‘ದೇವಾನಂಪಿಯ’ ಎಂದರೆ ದೇವತೆಗಳಿಗೆ ಪ್ರಿಯನಾದವನು ಎಂದರ್ಥ. ಅಶೋಕನನ್ನು ‘ಪಿಯದಸ್ಸಿ’ ಎಂದೂ ಕರೆಯಲಾಗುತ್ತಿತ್ತು. ಇದರ ಅರ್ಥ ಕರುಣೆಯಿಂದ ನೋಡುವವನು ಎಂದಾಗಿದೆ.ಸ್ರೋತ – ಅಶೋಕ-ಗಾಯಕ್ವಾಡ್ ಲೆಕ್ಚರ್ಸ್, ರಾಧಾಕುಮುದ್ ಮುಖರ್ಜಿ .

ಮಯೂರಶರ್ಮರು ಬ್ರಾಹ್ಮಣ ಕುಟುಂಬದಲ್ಲಿ ಜನಿಸಿದರು. ಕಾಂಚೀಪುರದಲ್ಲಿ ಪಲ್ಲವರ ಕಾವಲುಗಾರನಿಂದ ಅವಮಾನಕ್ಕೊಳಗಾಗಿ, ಶಸ್ತ್ರಾಸ್ತ್ರಗಳನ್ನು ಕೈಗೆತ್ತಿಕೊಂಡರು. ಪಲ್ಲವರ ಸೈನ್ಯವನ್ನು ಸೋಲಿಸಿ, ಪಶ್ಚಿಮ ಸಮುದ್ರದಿಂದ ತುಂಗಭದ್ರಾ ಅಥವಾ ಮಲಪ್ರಭಾ ನದಿಯವರೆಗಿನ ಪ್ರದೇಶದಲ್ಲಿ ತಮ್ಮ ಅಧಿಕಾರವನ್ನು ಸ್ಥಾಪಿಸಿದರು.

ವಿಜಯನಗರ ಸಾಮ್ರಾಜ್ಯವು ಬಲಿಷ್ಠ ಅಶ್ವದಳವನ್ನು ಹೊಂದಿತ್ತು. ಪಶ್ಚಿಮ ಕರಾವಳಿಯ ಭಟ್ಕಳ ಮತ್ತು ಹೊನ್ನಾವರ ಬಂದರುಗಳು ಪರ್ಷಿಯನ್ ಕುದುರೆಗಳು ಮತ್ತು ಮುತ್ತುಗಳ ಆಮದು ಕೇಂದ್ರಗಳಾಗಿದ್ದವು.

ಆರಂಭದಲ್ಲಿ ಅರಬ್ಬರು ಈ ವ್ಯಾಪಾರವನ್ನು ನಿಯಂತ್ರಿಸುತ್ತಿದ್ದರು. ನಂತರ ಪೋರ್ಚುಗೀಸರು ವ್ಯಾಪಾರದ ನಿಯಂತ್ರಣ ಪಡೆದು ಗೋವಾಕ್ಕೆ ಸ್ಥಳಾಂತರಿಸಿದರು. ಶ್ರೀಕೃಷ್ಣದೇವರಾಯನು ಕುದುರೆಗಳ ಆಮದು ವ್ಯಾಪಾರದ ಏಕಸ್ವಾಮ್ಯಕ್ಕಾಗಿ ಪೋರ್ಚುಗೀಸರಿಗೆ ವಾರ್ಷಿಕ ಹಣ ನೀಡಲು ಒಪ್ಪಿಕೊಂಡಿದ್ದನು.

ಉತ್ತಮ ತಳಿಯ ಕುದುರೆಗಳ ಆಮದು ಸ್ಥಗಿತಗೊಂಡಿದ್ದು, ರಕ್ಕಸ-ತಂಗಡಿ ಯುದ್ಧದಲ್ಲಿ ರಾಮರಾಯನ ಸೋಲಿಗೆ ಒಂದು ಕಾರಣವೆಂದು ಪರಿಗಣಿಸಲಾಗಿದೆ.

ಆಕರ: A Forgotten Empire – ರಾಬರ್ಟ್ ಸ್ವೆಲ್

ಶಿವಾಜಿಯವರ ತಂದೆಯಾದ ಶಹಾಜಿ ಭೋಸ್ಲೆ ವಿಜಯಪುರ ಸುಲ್ತಾನರ ಸೇವೆಯಲ್ಲಿದ್ದರು. ಆದಿಲ್ ಷಾ ಅವರಿಗೆ ಬೆಂಗಳೂರು ಮತ್ತು ಸುತ್ತಮುತ್ತಲಿನ ಪ್ರದೇಶಗಳ ಜಹಗೀರನ್ನು ನೀಡಿದ್ದನು. ಶಹಾಜಿ ಸ್ವತಂತ್ರ ರಾಜನಂತೆ ಆ ಪ್ರದೇಶವನ್ನು ಆಳುತ್ತಿದ್ದರು. ಅವರು ಗೌರಿಮಹಲ್ ಅರಮನೆಯನ್ನು ನಿರ್ಮಿಸಿದರು. ಈ ಜಹಗೀರು ಮೈಸೂರು ರಾಜ್ಯದೊಂದಿಗೆ ನಿರಂತರ ಯುದ್ಧದಲ್ಲಿತ್ತು.
ಶಿವಾಜಿಯವರು ಸುಲ್ತಾನರ ವಿರುದ್ಧ ದಂಗೆ ಎದ್ದಾಗ ಶಹಾಜಿಯನ್ನು ಬಂಧಿಸಲಾಯಿತು. ನಂತರ ಏಕೋಜಿ ಅವರು ಶಹಾಜಿಯವರ ಉತ್ತರಾಧಿಕಾರಿಯಾದರು. ಶಿವಾಜಿಯವರು ಏಕೋಜಿಯಿಂದ ಬೆಂಗಳೂರು ಜಹಗೀರನ್ನು ವಶಪಡಿಸಿಕೊಂಡು, ನಂತರ ಅದನ್ನು ಏಕೋಜಿಯವರ ಪತ್ನಿಗೆ ನೀಡಿದರು. ಶಿವಾಜಿಯವರ ಮರಣದ ನಂತರ ಅವರ ಮಗ ಸಂಭಾಜಿ ಜಹಗೀರಿನ ಆಡಳಿತವನ್ನು ವಹಿಸಿಕೊಂಡರು.
ಆಕರ: A Concise History of Karnataka – ಸೂರ್ಯನಾಥ ಕಾಮತ್

ಶ್ರವಣಬೆಳಗೊಳದ 7ನೇ ಶತಮಾನದ ಶಾಸನಗಳ ಪ್ರಕಾರ, ಚಂದ್ರಗುಪ್ತ ಮೌರ್ಯರು ತಮ್ಮ ಸಿಂಹಾಸನವನ್ನು ತ್ಯಜಿಸಿ, ಗುರು ಭದ್ರಬಾಹು ಅವರೊಂದಿಗೆ ಶ್ರವಣಬೆಳಗೊಳಕ್ಕೆ ಬಂದರು. ಜೈನ ಧರ್ಮವನ್ನು ಸ್ವೀಕರಿಸಿ, ಸನ್ಯಾಸ ಜೀವನ ನಡೆಸಿ ಅಲ್ಲಿಯೇ ಮರಣ ಹೊಂದಿದರು ಎಂದು ಹೇಳಲಾಗುತ್ತದೆ. ಅವರು ಚಂದ್ರಗಿರಿಯಲ್ಲಿ ವಾಸವಿದ್ದರು. ಈ ಘಟನೆಯ ಬಗ್ಗೆ ಭಿನ್ನಾಭಿಪ್ರಾಯಗಳಿವೆ.

ಕರ್ನಾಟಕವು ಜೈನ ಧರ್ಮದ ಪ್ರಮುಖ ಕೇಂದ್ರವಾಗಿದೆ. ಮೂಡುಬಿದಿರೆಯನ್ನು ಅನೇಕ ಜೈನ ಬಸದಿ‍ಗಳಿರುವುದರಿಂದ ‘ದಕ್ಷಿಣ ಕಾಶಿ’ ಎಂದು ಕರೆಯುತ್ತಾರೆ. ಕಾರ್ಕಳದಲ್ಲಿ ಗೊಮ್ಮಟೇಶ್ವರನ ಎರಡನೇ ಅತಿ ದೊಡ್ಡ ಏಕಶಿಲಾ ಪ್ರತಿಮೆ ಇದೆ.

ಆಕರ: A Concise History of Karnataka – ಸೂರ್ಯನಾಥ ಕಾಮತ್

ಬಸವೇಶ್ವರರು 12ನೇ ಶತಮಾನದ ಸಮಾಜ ಸುಧಾರಕರು. ಅವರು ಬಿಜಾಪುರ ಜಿಲ್ಲೆಯ ಬ್ರಾಹ್ಮಣ ಕುಟುಂಬದಲ್ಲಿ ಜನಿಸಿ, ಕನ್ನಡ ಮತ್ತು ಸಂಸ್ಕೃತ ಭಾಷೆಗಳನ್ನು ಕಲಿತರು. ಬಿಜ್ಜಳನ ಆಸ್ಥಾನದಲ್ಲಿ ಮುಖ್ಯ ಭಂಡಾರಾಧಿಕಾರಿಯಾಗಿ ಸೇವೆ ಸಲ್ಲಿಸಿದರು.
ಅವರು ಕಲ್ಯಾಣದಲ್ಲಿ ‘ಅನುಭವ ಮಂಟಪ’ ವನ್ನು ಸ್ಥಾಪಿಸಿದರು. ಇದು ಆಧ್ಯಾತ್ಮಿಕ ಚರ್ಚೆಗಳ ಮುಕ್ತ ವೇದಿಕೆಯಾಗಿತ್ತು. ಬಸವಣ್ಣನವರು ಜಾತಿಭೇದ, ಬಾಲ್ಯವಿವಾಹ ಮತ್ತು ವಿಧವೆಯರ ಮೇಲಿನ ಅನ್ಯಾಯವನ್ನು ವಿರೋಧಿಸಿದರು. ಅವರ ಗೌರವಾರ್ಥವಾಗಿ ಕಲ್ಯಾಣಕ್ಕೆ ‘ಬಸವಕಲ್ಯಾಣ’ ಎಂದು ಮರುನಾಮಕರಣ ಮಾಡಲಾಯಿತು.

ಜಗದ್ಗುರು ಶಂಕರಾಚಾರ್ಯರು ನಾಲ್ಕು ವೇದಗಳ ರಕ್ಷಣೆ ಮತ್ತು ಪ್ರಚಾರಕ್ಕಾಗಿ ದೇಶದ ನಾಲ್ಕು ದಿಕ್ಕುಗಳಲ್ಲಿ ನಾಲ್ಕು ಮಠಗಳನ್ನು ಸ್ಥಾಪಿಸಿದರು. ಅವುಗಳಲ್ಲಿ ಮೊದಲನೆಯದು ಶೃಂಗೇರಿ ಮಠ. ಉಳಿದ ಮಠಗಳು ಪುರಿ, ದ್ವಾರಕೆ ಮತ್ತು ಬದರಿನಾಥದಲ್ಲಿವೆ.
14ನೇ ಶತಮಾನದಲ್ಲಿ ವಿದ್ಯಾರಣ್ಯರು ಹರಿಹರನಿಗೆ ವಿಜಯನಗರ ಸಾಮ್ರಾಜ್ಯ ಸ್ಥಾಪಿಸಲು ಸಹಾಯ ಮಾಡಿದರು. ಶೃಂಗೇರಿಯ ವಿದ್ಯಾಶಂಕರ ದೇವಾಲಯ, ಶಾರದಾ ದೇವಾಲಯ ಮತ್ತು ತುಂಗಾ ನದಿ ಸುಂದರ ಪ್ರವಾಸಿ ತಾಣಗಳಾಗಿವೆ.

ಗಿಲ್ಡ್‌ಗಳು ವ್ಯಾಪಾರಿಗಳು ಮತ್ತು ಕುಶಲಕರ್ಮಿಗಳ ಸಂಘಗಳಾಗಿದ್ದು, ವ್ಯಾಪಾರ, ಗುಣಮಟ್ಟ, ಬೆಲೆ ಮತ್ತು ವೃತ್ತಿಪರ ನಡವಳಿಕೆಯನ್ನು ನಿಯಂತ್ರಿಸುತ್ತಿದ್ದವು. ಇವು ಸಾಲ ಸೌಲಭ್ಯ ಮತ್ತು ಸಾಮಾಜಿಕ ಭದ್ರತೆಯನ್ನೂ ಒದಗಿಸುತ್ತಿದ್ದವು.

ಐಯ್ಯಾವೊಳೆ 500 (ಐಹೊಳೆ) ಮಧ್ಯಕಾಲೀನ ಭಾರತದ ಪ್ರಮುಖ ವ್ಯಾಪಾರಿ ಸಂಘಗಳಲ್ಲಿ ಒಂದಾಗಿತ್ತು. ಇದು ದೂರದ ಪ್ರದೇಶಗಳ ಮತ್ತು ವಿದೇಶಗಳೊಂದಿಗೆ ವ್ಯಾಪಾರ ನಡೆಸುತ್ತಿತ್ತು. ಚೋಳರು ಸೇರಿದಂತೆ ಹಲವು ರಾಜವಂಶಗಳೊಂದಿಗೆ ನಿಕಟ ಸಂಬಂಧ ಹೊಂದಿತ್ತು. ಶ್ರೀಲಂಕಾದ ಪದವಿಯದಲ್ಲಿಯೂ ಐಯ್ಯಾವೊಳೆ ಸಂಘವನ್ನು ಉಲ್ಲೇಖಿಸುವ ಶಾಸನ ದೊರೆತಿದೆ.

ಕರ್ನಾಟಕ ಎಂಬ ಹೆಸರಿನ ಬಗ್ಗೆ ವಿದ್ವಾಂಸರು ಹಲವು ಅಭಿಪ್ರಾಯಗಳನ್ನು ಹೊಂದಿದ್ದಾರೆ. ಆದರೆ ಹೆಚ್ಚು ಒಪ್ಪಿತವಾದ ಅಭಿಪ್ರಾಯದ ಪ್ರಕಾರ, ‘ಕರು’ + ‘ನಾಡು’ ಎಂದರೆ ‘ಎತ್ತರದ ನಾಡು’ ಅಥವಾ ‘ವಿಶಾಲವಾದ ನಾಡು’ ಎಂದರ್ಥ. ಕರ್ನಾಟಕದ ಬಹುಭಾಗ ದಖನ್ ಪ್ರಸ್ಥಭೂಮಿಯಲ್ಲಿರುವುದರಿಂದ ಈ ಹೆಸರು ಬಂದಿದೆ ಎಂದು ನಂಬಲಾಗಿದೆ. ತಮಿಳು ಗ್ರಂಥಗಳಲ್ಲಿಯೂ ಕರ್ನಾಟಕವನ್ನು ‘ಕರುನಾಟ್’ ಎಂದು ಉಲ್ಲೇಖಿಸಲಾಗಿದೆ.
ಆಕರ: A Concise History of Karnataka – ಸೂರ್ಯನಾಥ ಕಾಮತ್