அக்ஷய திரிதியை இவை அனைத்துடனும் தொடர்புடையது, ஆனால் அக்ஷய திரிதியையின் முதன்மையான தொடர்பு செல்வத்துடன் உள்ளது. இதைப் பற்றி பல நம்பிக்கைகள் (வாய்வழி மரபுகளில்) உள்ளன. செல்வத்திற்கும் செழிப்பிற்கும் அதிபதியான லட்சுமி தேவி இன்றுதான் பாற்கடலில் இருந்து தோன்றியதாக நம்பப்படுகிறது. நாட்டுப்புறக் கதைகளின்படி, இன்றுதான் கிருஷ்ணர் தனது ஏழை பக்தரான குசேலனின் குடிசையை ஒரு அற்புதமான அரண்மனையாக மாற்றினார். இன்றுதான் குபேரர் தேவர்களின் பொருளாளராக நியமிக்கப்பட்டார். விஸ்வாமித்திரர் போன்ற பெரிய முனிவர்கள் இந்த நாளில் லட்சுமி விரதம் இருந்ததாகக் கூறப்படுகிறது. உணவு மற்றும் ஊட்டச்சத்தின் தெய்வமான அன்னபூரணி தேவி சிவபெருமான் முன் தோன்றி அவருக்கு உணவு வழங்கியது இந்த நாளில்தான். ஆதாரம்: பி. வி. கானே. தர்மசாஸ்திர வரலாறு; வனமாலி.

Picture – Raja Ravi Varma painting of Annapoorani

அட்சய என்றால் “முடிவற்ற” அல்லது “வற்றாத” என்று பொருள். திருதியை என்பது வைகாசி மாதத்தின் சுக்ல பக்ஷத்தின் மூன்றாம் நாளைக் குறிக்கிறது. இது மிகவும் மங்களகரமான பண்டிகைகளில் ஒன்றாகும், இந்த நாளில் தானம் செய்தாலும், தியாகம் செய்தாலும், மந்திரம் சொன்னாலும், அது வற்றாததாகிவிடும். இந்த நாளில் மேற்கொள்ளப்படும் விரதம் வற்றாத பலன்களைத் தரும். இந்த பண்டிகையைப் பற்றிய பல நம்பிக்கைகளின் மையப் பகுதியாக “முடிவற்ற” அல்லது “வற்றாத” என்ற கருப்பொருள் இருப்பதை நாம் பார்க்கலாம். ஆதாரம்: பி. வி. கானே. தர்மசாஸ்திர வரலாறு

Picture – Mahalakshmi emerging from Ksirasagara

இவை நான்கையும், சாடே தீன் (மூன்றரை) முஹூர்ரத் என்று அழைப்பார்கள். அக்ஷய திரிதியை இதன்அரைப் பகுதியாகக் கருதப்படுகிறது. அக்ஷய திரிதியை அன்று முழுமையான விரதம் இருப்பது ராஜசூய யாகம் செய்ததற்குச் சமம். அக்ஷய திரிதியை விரதத்தை விதிகளின்படி ஒரு முறையாவதுஅனுசரித்தாலும் போதும், அது அனைத்து திரிதியைகளையும் செய்ததற்கான பலன்களைத் தரும்.

இந்த நாளின் புனிதத்தை நாரதர் விவரிக்கிறார். மன்னர் அம்பரீசர் தனது செல்வம், ராஜ்ஜியம், குடிமக்கள் மற்றும் உறவினர்களால் மிகவும் திருப்தி அடைந்தார். எனக்கு இந்த அளவு வலம் வர என்ன காரணம் என்று நாரதரிடம் கேட்டார். நாரதர் அம்பரீசர் தனது முந்தைய பிறவியில், தேவதாசர் என்ற பொற்கொல்லராக இருந்தார் என்றும், ரூபவதி என்ற தாசியை அவர் காதலித்ததாகவும் விளக்கினார். அவள் பக்தியுள்ளவள், அட்சய திருதியை அன்று ஒரு பிராமணருக்கு காணிக்கையாக விஷ்ணுவின் தங்க மூர்த்தியைச் செய்யும்படி தேவதாசரிடம் கேட்டாள். தேவதாசர் அதை கடமையாகச் செய்தார். அவள் அந்த மூர்த்தியை ஒரு பிராமணருக்கு நன்கொடையாக அளித்தாள், மேலும் அட்சய திருதியையின் சடங்குகளைச் செய்யும்படி தேவதாசரைக் கேட்டாள். தேவதாசர் அதை விருப்பத்துடன் செய்தார். அக்ஷய திருதியையை உண்மையாகக் கடைப்பிடித்ததன் விளைவாக, இருவரும் அரச தம்பதிகளாக மீண்டும் பிறந்தனர். ஆதாரம்: ஆர்.கே. மடம். இந்து பண்டிகைகள் மற்றும் புனித நாட்கள். மத்ஸ்ய புராணம். பத்ம புராணம்.

Picture – Subh Muhurat

தீபாவளிக்குப் பிறகு, குளிர்காலத்திற்காக இமயமலையில் உள்ள சார் தாம்கள் (Char Dham) மூடப்படும். விக்ரஹங்களை தாழ்வான பகுதிகளுக்கு அழைத்துச் சென்று விடுவார்கள். இந்த கோயில்களை மீண்டும் கோடை காலத்தில் திறப்பார்கள். கங்கோத்ரி மற்றும் யமுனோத்ரி கோயில்கள் அக்ஷய திருதியை நாளில் மீண்டும் திறக்கப்படுகின்றன. கேதார்நாத் மற்றும் பத்ரிநாத் இதற்கு சில நாட்களுக்குப் பிறகு திறக்கப்படுகின்றன. அக்ஷய திருதியை கங்கையுடன் வலுவான தொடர்பு உடையது. அக்ஷய திருதியை நாளில் கங்கை பூமியில் இறங்கியதாகவும் நம்பப்படுகிறது. முன்னர் கவனித்தபடி, அக்ஷய திருதியை முடிவில்லாத அல்லது வற்றாத விஷயங்களுடன் (எப்போதும் பாயும் கங்கை போன்ற) மிகவும் வலுவான தொடர்பு உடையது. மூலம்: உத்தரகண்ட் அரசு.

Picture – Route to Gangotri

ரிஷபதேவர் ஜைனர்களின் முதல் தீர்த்தங்கரர், எனவே அவர் ஆதிநாதர் என்றும் அழைக்கப்படுகிறார். அவர் இந்திய சமுதாயத்தில் முதல் மன்னர் என்று ஜைனர்கள் நம்புகிறார்கள். மேலும் அயோத்தியில் இருந்து ஆட்சி செய்ததாக நம்புகிறார்கள். அவர் தனது ராஜ்யத்தைத் துறந்து துறவற வாழ்க்கையை எய்தினார். பதின்மூன்று மாதங்கள் உணவுள்ளாமல் இருந்தார். தனது உண்ணாவிரதத்தின் கடைசி ஆறு மாதங்களில், மக்கள் அவருக்கு வழங்கிய உணவை மறுத்துவிட்டார், ஏனெனில் அது ஒரு துறவிக்கு ஏற்ற விதத்தில் தயாரிக்கப்படவில்லை. பதின்மூன்று மாதங்களுக்குப் பிறகு அவர் ஹஸ்தினாபுரத்திற்குள் நுழைந்தார், அங்கு மன்னர் ஷ்ரேயான்சா அவருக்கு ஒரு துறவிக்கு ஏற்ற கரும்புச் சாற்றை வழங்கினார். தனது துறவற வாழ்க்கையைத் தொடங்கிய பிறகு அவர் சாப்பிட்ட முதல் உணவு இதுவாகும். விரதத்தை முடித்துக் கொண்ட நாள் அக்ஷய திரிதியை.

இன்றும் கூட, சமணர்கள் ஒரு வருடம் முழுதும், ஒரு நாள் விட்டு ஒரு நாள் உணவு உண்டு விரதம் கடைப்பிடிக்கிறார்கள். அக்ஷய திரிதியை அன்று ஹஸ்தினாபுரத்தில் விரதத்தை முடிக்கிறார்கள். இந்த விரதம் வர்சி தபம் என்று அழைக்கப்படுகிறது. ஆதாரம்: நதுபாய் ஷா. சமண மதம். வெற்றியாளர்களின் உலகம்.

Picture – Adinath receiving sugarcane juice from Shreyansa

அவந்தியின் (Ujjain) மன்னர் இந்திரத்யும்னன். பூரி ஜகந்நாதர் கோயிலைக் கட்டவும், தெய்வங்களைச் செதுக்கவும் அவருக்கு வரம் கிடைத்தது. அக்ஷய திருதியை நாளில் ரத யாத்திரைக்கான தயாரிப்புகளைத் தொடங்கினார். அக்ஷய திருதியை நாளில் தேர் கட்டுவதற்கு ஒரு ஆச்சார்யரை நியமித்தார். பகவான் ஜெகந்நாதரே கோயிலில் பின்பற்ற வேண்டிய பண்டிகைகள் மற்றும் சடங்குகளை வகுத்து, அக்ஷய திருதியை அன்று, தெய்வத்தின் மீது ஏராளமான சந்தனம் பூசப்பட வேண்டும் என்று குறிப்பிட்டார்.

சுவாரஸ்யமாக, பூரிக்கு தெற்கே (விசாகப்பட்டினத்திற்கு அருகில்) சிம்ஹாசலத்தில் உள்ள மற்றொரு கோவிலில், சந்தனம் பூசுவது தொடர்பான மற்றொரு சடங்கு நடைபெறுகிறது. அங்கு, நரசிம்ம விக்ரகம் எப்போதும் சந்தனத்தால் முழுமையாக மூடப்பட்டிருக்கும், எனவே வருடத்தின் எந்த நாளிலும் முழு தரிசனம் சாத்தியமில்லை. அக்ஷய திருதியை நாளில் மட்டும், சந்தனம் அகற்றப்படுகிறது. பக்தர்கள் நரசிம்ம சுவாமியின் முழு தரிசனத்தைப் பெறலாம். ஆதாரம்: ஸ்கந்த புராணம்; எம்.வி.சத்தியநாராயணா. ஸ்ரீ ஜகந்நாத க்ஷேத்ர மஹாத்யம்.

Pictrue – Indradyumna Sarovar at Puri

பரசுராமர் ஜமதக்னி மற்றும் ரேணுகாவுக்கு அக்ஷய திருதியாவில் பிறந்தார். எனவே இந்த நாள் பரசுராம ஜெயந்தி என்றும் கொண்டாடப்படுகிறது. தனது தந்தையின் கட்டளையை கடைப்பிடித்து, பரசுராமர் தனது தாயைக் கொல்கிறார். துக்கத்தில் மூழ்கிய பரசுராமருக்கு அவரது தந்தை ஒரு வரம் வழங்குகிறார். தனது தாயை உயிர்ப்பிக்குமாறு பரசுராமர் கோருகிறார். பின்னர், ஒரு க்ஷத்திரியனின் மகன் ஜமதக்னியைக் கொல்கிறான். ரேணுகா சதி ஏற்கிறாள். இதற்கு பழிவாங்கும் விதமாக பரசுராமர் அனைத்து க்ஷத்திரியர்களையும் இருபத்தொரு முறை கொல்கிறார்.

இமாச்சலப் பிரதேசத்தில் ரேணுகாஜி என்ற ஒரு ஏரி உள்ளது, இது பரசுராமரின் பிறப்பிடம் என்று நம்பப்படுகிறது. ரிஷி ஜமதக்னி இறந்த பிறகு ரேணுகா இந்த ஏரியில் குதித்து இறந்ததாக நம்பப்படுகிறது. இந்த ஏரி ரேணுகாவின் உடல் வடிவம் போல் இருக்கிறது. மேலிருந்து பார்க்கும்போது, ​​சுருண்டு விழுந்த ஒரு பெண் போல் தெரிகிறது. அருகிலுள்ள ஒரு மலை, ரிஷி ஜமதக்னி தவம் செய்த இடமாக நம்பப்படுகிறது. பரசுராம ஏரி என்ற சிறிய ஏரியும் உள்ளது, மேலும் ஏரியைச் சுற்றி ரேணுகா மற்றும் பரசுராமருக்கு கோயில்கள் உள்ளன. மகாராஷ்டிராவில் உள்ள சிப்லுன், கேரளாவில் திருவல்லம் மற்றும் இமாச்சலப் பிரதேசத்தில் உள்ள நிர்மந்த் ஆகிய இடங்களிலும் முக்கியமான பரசுராம கோயில்கள் உள்ளன. க்ஷத்திரியர்களைக் கொன்ற பிறகு, தான் ஆளுவதற்காக பரசுராமர் தனது கோடரியை கடலில் எறிந்து ஒரு நிலத்தை உருவாக்கினார். இந்த கோடாலி வீச்சால் கோகர்ணத்திற்கு தெற்கே உள்ள நிலத்திலிருந்து கடல் பின்வாங்கியது. எனவே, கர்நாடகாவில் உள்ள கோகர்ணத்திலிருந்து தெற்கு வரை உள்ள பகுதி பரசுராம க்ஷேத்திரம் என்று நம்பப்படுகிறது. பி. வி. கானே. தர்மசாஸ்திர வரலாறு. இமாச்சலப் பிரதேச அரசு.

Picture – Renukaji lake in Himachal Pradesh

அக்ஷய பாத்ரா என்பது பள்ளிக் குழந்தைகளை மையமாகக் கொண்ட அன்னதான முயற்சி. இது இஸ்கான் தாசர்களால் ஊக்குவிக்கப்பட்டது. இருப்பினும் இது ஒரு சுயாதீன நிறுவனமாக இயங்குகிறது. இது ஒரு நாளைக்கு 22.5 லட்சத்திற்கும் மேற்பட்ட குழந்தைகளுக்கு உணவளிக்கிறது. தொடங்கப்பட்டதிலிருந்து, இது 400 கோடிக்கும் மேற்பட்ட சத்தான உணவுகளை வழங்கியுள்ளது. இது 16க்கும் மேற்பட்ட மாநிலங்களிலும் 75 இடங்களிலும் செயல்படுகிறது. இது பல சமையலறைகளை நடத்துகிறது மற்றும் 23,000க்கும் மேற்பட்ட பள்ளிகளுக்கு சேவை செய்கிறது. அக்ஷய பாத்ரா பொதுமக்களிடமிருந்து நன்கொடைகளையும் அரசாங்கத்தின் மதிய உணவு திட்டங்களிலிருந்து மானியங்களையும் பெறுகிறது. மூலம்: அக்ஷய பாத்ரா அறக்கட்டளை.

Picture – Akshaya Patra mechanised kitchen

பாண்டவர்கள் வனவாசம் செல்லும்போது, பல பிராமணர்கள் தங்கள் உறவினர்களுடன் பாண்டவர்களைப் பின்பற்ற முடிவு செய்கிறார்கள். பாண்டவர்களே வனவாசத்தில் இருக்கும்போது அவர்கள் அனைவருக்கும் எப்படி உணவளிப்பது என்று யுதிஷ்டிரர் கவலைப்படுகிறார். அப்போது, பாண்டவர்களின் புரோகிதர், தௌம்யர், சூரியன் அனைவருக்கும் உணவளிக்கிறார் என்றும், அவரை அணுகும்படியும் யுதிஷ்டிரரிடம் கூறுகிறார். யுதிஷ்டிரர் திவாகர பூஜை செய்கிறார். மகிழ்ச்சியடைந்த சூரியன் யுதிஷ்டிரர் முன் தோன்றி, பாண்டவர்களின் சமையலறையில் பழங்கள், கிழங்குகள், இறைச்சி மற்றும் காய்கறிகள் என நான்கு வகையான உணவுகளுக்கு என்றும் குறைவிருக்காது என்று உறுதியளிக்கிறார்.

மகாபாரதத்தின் அதிகார பூர்வமான பதிப்பில், அக்ஷய பாத்திரம் இடம்பெறவில்லை. சூரிய பகவான் கொடுத்த இந்த வரம் மட்டுமே சொல்லப்பட்டிருக்கிறது. மற்ற பதிப்புகளிலும் பிரபலமான கதைகளிலும், சூரியன் யுதிஷ்டிரருக்கு அக்ஷய பாத்திரத்தை பரிசாக அளிப்பதாக சொல்லப்படுகிறது, ஒரு துளி உணவு இந்த பாத்திரத்தில் இருந்தாலும் போதும், எடுக்க எடுக்க உணவு குறையாது. ஆனால், இந்த பாத்திரம் காலியாக இருந்தால் உணவு வராது. ஒரு நாள், துர்வாச முனிவர் தனது பரிவாரங்களுடன் பாண்டவர்களைச் சந்திக்க வந்தார். அதற்கு சற்று முன்பே ​​திரௌபதி அனைவருக்கும் உணவு அளித்துவிட்டு தானும் சாப்பிட்டுவிட்டு, அக்ஷய பாத்திரத்தை காலி செய்திருந்தாள். பாத்திரம் காலியாகிவிட்டதால் மறுநாள்வரை அதிலிருந்து உணவு வராது. துர்வாச முனிவருக்கு எப்படி உணவு இடுவது என்று புரியாமல் பயந்து போகிறாள். கிருஷ்ணரிடம் பிரார்த்தனை செய்கிறாள், அவர் அக்ஷய பாத்திரத்தில் ஒரு துண்டு உணவு மிச்சம் இருப்பதை காண்கிறார். அவர் அந்தத் துண்டைச் சாப்பிடுகிறார். அதிசயமாக துர்வாசரும் அவரது சீடர்களும் அதே நேரத்தில் பசி தீர்ந்து திருப்தி அடைந்ததாக உணர்கிறார்கள். ஆதாரம்: அர்ஜுன் பரத்வாஜ் மற்றும் ஹரி ரவிக்குமார். Essential Mahabharata

Picture – Rock art believed to be Pandavas and Draupadi with Akshaya Patra at Amba Teerth, Karnataka

திரேதா யுகம் அக்ஷய திரிதியை அன்று தொடங்கியது. இந்த நாளில் செய்யப்படும் எதுவும், அது ஸ்நானம், தானம், ஜபம், படிப்பு, சிரார்த்தம் என எதுவாக இருந்தாலும், அது தீர்ந்து போகாது. வியாசர் அக்ஷய திரிதியை அன்று விநாயகருக்கு மகாபாரதத்தை விளக்கத் தொடங்கினார். இது மகாபாரதத்தின் அதிகாரப்பூர்வ பதிப்பின் ஒரு பகுதி அல்ல. இருப்பினும், இது அக்ஷய திரிதியையுடன் தொடர்புடைய மங்களத்தை அடிக்கோடிட்டுக் காட்டுகிறது. ஆதாரம்: பி.வி. கேன். தர்மசாஸ்திரங்களின் வரலாறு.

Picture – Pattachitra painting of Dasavaratha that spans all yugas.